ஆனந்தக் களிப்பு

கண்ணன் என் காதலன்!
[ஆனந்தக் களிப்பு]
　　
நல்லிசை மீட்டிடும் கண்ணா! - காதல்
　　　நற்கவி தீட்டிடும் பொற்புடை மன்னா!
சொல்லிசை யூட்டிடும் பொன்னா! - நெஞ்சம்
　　　சொர்க்கமே ஈட்டிடும் உன்பெயர் சொன்னா!
　　　　　　　　　　[நல்லிசை]
　　
மாமலை யாண்டிடும் மாயா! - மார்பில்
　　　மங்கையைப் பூண்டிடும் பொங்கெழில் துாயா!
பூமலை காத்திடும் நேயா! - வண்ணப்
　　　புன்னகை பூத்திடும் இன்மது வாயா!
　　　　　　　　　　[நல்லிசை]
　　
விண்ணொளி சூட்டிடும் திருவே! - உன்றன்
　　　கண்ணொளி ஓட்டிடும் புண்ணெறி யிருளே!
மண்ணொளி நாட்டிடும் உருவே! - பாடும்
　　　பண்ணொலி காட்டிடும் பாவையென் உறவே!
　　　　　　　　　　[நல்லிசை]
　　
வேங்கடம் போற்றிடும் வீரா! - நெஞ்ச
　　　வேதனை மாற்றிடும் சாதனை மாறா!
தேங்கனி ஏற்றிடும் தீரா! - என்னைத்
　　　தேற்றிடும் சாற்றிடும் காத்திடும் சீரா!
　　　　　　　　　　[நல்லிசை]
　　
மின்மணி மாலைகள் கொண்டாய்! - வாச
　　　வெண்பனிச் சோலைகள் விண்மணி கண்டாய்!
நன்மணிச் சேலைகள் தந்தாய்! - இந்தப்
　　　பெண்மணி வேலைகள் இன்புற வந்தாய்!
　　　　　　　　　　[நல்லிசை]

பாட்டரசர் கி. பாரதிதாசன்
கம்பன் கழகம் பிரான்சு
தொல்காப்பியர் கழகம் பிரான்சு
09.05.2020