பாவலர் பயிலரங்கில்
ஐந்நுாறு விருத்தங்கள் பாடிப்
பாவலர் பட்டம் பெற்ற
.
பாவலர் நகுலா சிவநாதன்
பல்லாண்டு வாழ்க!
.
பாடு மரங்கில் பற்றுடனே
...........பயின்றார் நகுலா சிவநாதர்!
ஆடு மயிலின் அழகாக
...........அளித்தார் விருத்தம் ஐந்நுாறு!
காடு மணக்குங் கவியெழுதிக்
...........களித்தார் உள்ளங் குளிர்ந்திடவே!
நாடு போற்றும் பாவலராய்
...........நன்றே வாழ்க பல்லாண்டே!
.
ஓடி யோடித் தமிழ்பேசி
...........உயர்ந்தார் நகுலா சிவநாதர்
பாடிப் பாடிப் பயிலரங்கில்
...........பட்டம் பெற்று மிளிர்கின்றார்!
தேடித் தேடித் தேனீக்கள்
...........சேர்க்கும் மதுவாய்க் கவிதந்தார்!
கோடி கோடி சீர்சூடிக்
...........கொழித்து வாழ்க பல்லாண்டே!
.
அகநுால் புறநுால் ஆய்வுகளை
...........அளிக்கும் நகுலா சிவநாதர்
முகநுால் போற்றும் விருத்தங்கள்
...........முத்தாய் மொழிந்து பெயருற்றார்!
மிகுநுால் புலமை பொலிந்திடவே
...........வியன்னுால் பலவும் படைத்துள்ளார்!
சுகநுால் பாடும் பாட்டரசன்
...........சொன்னேன் வாழ்க பல்லாண்டே!
.
சீரார் கல்விச் சேவையினைச்
...........செய்யு நகுலா சிவநாதர்
ஊரார் உறவார் உவந்திடவே
...........ஓதி யோதி உயர்வுற்றார்!
ஏரார் நிலத்துப் பசுமையென
...........எழிலார் சோலை வாசமெனப்
பேரார் பெருமை, கவித்தலைமை
...........பேணி வாழ்க பல்லாண்டே!
.
சொல்லும் பொருளும் உரைக்கின்ற
...........துாய நகுலா சிவநாதர்
அல்லும் பகலும் இனமோங்க
...........ஆக்கந் தீட்டி நலஞ்செய்தார்!
செல்லும் இடங்கள் சீர்பாடும்!
...........செம்மைத் தமிழோ தார்சூடும்!
வெல்லுங் கவிதைப் பாட்டரசன்
...........விளித்தேன் வாழ்க பல்லாண்டே!
.
பாட்டரசர் கி. பாரதிதாசன்
தலைவர்
கம்பன் கழகம், பிரான்சு
தொல்காப்பியர் கழகம், பிரான்சு.
பாவலர் பயிலரங்கம், பிரான்சு
27.06.2023
