விருத்த மேடை - 92
சந்தக் கலிவிருத்தம் - 9
தனதன+தனதனனா+தனதன+தனதனனா
[4+6+4+6 சந்த மாத்திரை]
திரைவிரி தருதுறையே, திருமணல் விரியிடமே,
விரைவிரி நறுமலரே, மிடைதரு பொழிலிடமே,
மருவிரி புரிகுழலே, மதிபுரை திருமுகமே,
இருகயல் இணைவிழியே எனையிடர் செய்தவையே!
[சிலம்பு. கானல்வரி - 15]
தனதன+தனதனனா+தனதன+தனதனனா என்ற அமைப்புடைய பாடல் இது. முதற்சீரும் மூன்றாம் சீரும் 4 சந்த மாத்திரை பெறும். இவ்விடங்களில் தனதன, தந்தன, தானன என்ற சந்தங்களைப் பெறும்.
இரண்டாம் சீரும் நான்காம் சீரும் 6 சந்த மாத்திரை பெறும். இவ்விடங்களில் தனதனனா, தந்தனனா, தாதனனா, தனதனன, தந்தனன, தாதனன, முதலிய சீர்கள் வரும். இவை இறுதியில் ஒற்றுப் பெற்றும் வரும். தனதனன, தந்தான என்பவை 5 மாத்திரைச் சீர்கள் என்றாலும் அடியிறுதியிலும், அரையடி இறுதியிலும் வருவதால் சந்த இலக்கணப்படி 6 மாத்திரை பெறும். மோனை 1, 3 ஆம் சீர்களில் அமையும்.
புகழுறு திருமகளே! பொழிலுறு கவிமகளே!
அகமுறு தனியெழிலே! அமுதுறு தமிழிசையே!
முகமுறு மதியொளியே! முளையுறு தளிரழகே!
மிகவுறு கனவலையே! விரிவுறு சுகவுரையே!
[பாட்டரசர்]
மேற்கண்ட சந்தக் கலிவிருத்தம் ஒன்றே ஒன்று விரும்பிய தலைப்பில் இயற்றுமாறு அன்புடன் வேண்டுகிறேன்.
பாட்டரசர் கி. பாரதிதாசன்
கம்பன் கழகம் பிரான்சு.
தொல்காப்பியர் கழகம், பிரான்சு.
12.03.2023
Aucun commentaire:
Enregistrer un commentaire