பாவலர்மணி நிறைமதி நீலமேகம்
பிறந்தநாள் வாழ்த்து!
நெஞ்சுறும் தமிழை வேண்டி
நிறைமதி நீல மேகம்
பஞ்சுறும் மென்மை மிக்க
பாக்களை நன்றே செய்தார்!
விஞ்சுறும் ஆற்றல் ஓங்கி
விளைந்துள அகவை நன்னாள்
மஞ்சுறும் சீர்கள் பெற்று
வளமுடன் வாழ்க! வாழ்க!!
நீதியைத் தலைமேல் சூடி
நிறைமதி நீல மேகம்
சோதியை அகத்துள் ஏற்றிச்
சுடர்மிகு மேடை கண்டார்!
சாதியைப் போக்கும் எண்ணம்
சமத்துவம் பூக்கும் வண்ணம்
ஆதியை ஆழ்ந்து கற்றார்
அறிவொளி சூழ்க! சூழ்க!!
நிகரிலா மரபைக் கற்று
நிறைமதி நீல மேகம்
மிகுபலாத் தோப்பைப் போன்று
விளைந்திடும் புலமை பெற்றார்!
பகையிலா உலகம் வேண்டும்!
பசியிலா உயிர்கள் வேண்டும்!
புகழ்விழா நுால்கள் தீட்டிப்
புவியினை வெல்க! வெல்க!!
நிழற்றரும் மரத்தை ஒத்த
நிறைமதி நீல மேகம்
குழற்றரும் இசையைக் கூட்டிக்
குயிற்றரும் இன்பம் தந்தார்!
எழற்றரும் ஊக்கம், வாழ்விற்[கு]
எழிற்றரும் ஆக்கம் இட்டார்!
சுழற்றரும் காற்றாய் என்றும்
தொடர்நலம் காண்க! காண்க!
நிதிதரும் குடிக்கண் தோன்றி
நிறைமதி நீல மேகம்
ததிதரும் குளிர்ச்சி யாகத்
தமிழ்தரும் மாட்சி யுற்றார்!
சுதிதரும் இனிமை, நன்றே
சுவைதரும் மக்கள், காக்கும்
பதிதரும் வாழ்த்துச் சேர்க!
பல்லாண்டு வாழ்க! வாழ்க! [210]
27.10.2024
Aucun commentaire:
Enregistrer un commentaire